कार्तिकी यात्रेनिमित्त आळंदीत रस्त्यांच्या दुरुस्तीला सुरुवात; स्पीडब्रेकर बसवण्याची मागणी
आळंदी (प्रतिनिधीरवि.कदम)
आगामी कार्तिकी यात्रेच्या पार्श्वभूमीवर आळंदी नगरपरिषदेच्या वतीने रस्त्यांवरील खड्डे बुजवण्याच्या कामाला सुरुवात करण्यात आली आहे. यात्रेकरूंना सुरक्षित आणि सुरळीत वाहतूक सुविधा मिळावी, यासाठी नगरपरिषदेने दुरुस्तीचे काम युद्धपातळीवर सुरू केले आहे.
या कामासाठी उपमुख्यमंत्री एकनाथ शिंदे सहाय्यता निधी मधून मंजूर निधीचा वापर करण्यात येत असून, नगरपरिषदेच्या अभियंता विभागाच्या देखरेखीखाली मुख्य रस्त्यांवरील खड्डे बुजवणे, सिमेंट काँक्रीट दुरुस्ती आणि स्वच्छता कामे सुरू आहेत.
दरम्यान, देहू फाटा ते आळंदी मार्गावर स्पीडब्रेकर बसवण्यात यावेत, अशी स्थानिक नागरिक आणि सामाजिक संघटनांकडून मागणी करण्यात आली आहे. यात्रेच्या काळात मोठ्या प्रमाणावर वाहने आणि भाविकांची गर्दी होणार असल्याने अपघाताचा धोका कमी करण्यासाठी हे स्पीडब्रेकर उपयुक्त ठरणार असल्याचे नागरिकांचे म्हणणे आहे.
नगरपरिषदेकडून या मागणीवर सकारात्मक विचार सुरू असून, संबंधित विभागाला याबाबत आवश्यक निर्देश देण्यात आल्याची माहिती अधिकाऱ्यांकडून मिळाली आहे.
✍🏻मुख्य संपादक – रोहिदास कदम
