सासवड (ता. पुरंदर, जि. पुणे) प्रतिनिधी अशोक कुंभार: सासवड येथील प्रसिद्ध श्री काळभैरवनाथ मंदिरात सोमवती अमावास्येच्या पावन निमित्ताने सोमवार, दि. 15 जून 2026 रोजी भव्य पालखी सोहळा व अश्व मिरवणुकीचे आयोजन करण्यात आले. ग्रामस्थ व भाविकांच्या उत्स्फूर्त सहभागामुळे संपूर्ण परिसर भक्तिमय वातावरणाने दुमदुमून गेला.
श्री काळभैरवनाथ महाराजांच्या पालखीची मिरवणूक पारंपरिक वाद्यांच्या गजरात, जयघोष आणि भजन-कीर्तनाच्या वातावरणात मोठ्या थाटामाटात काढण्यात आली. सजविलेल्या अश्वांच्या सहभागामुळे मिरवणुकीची शोभा अधिक खुलून दिसली. या धार्मिक सोहळ्यात सासवड परिसरातील मोठ्या संख्येने भाविक, ग्रामस्थ आणि मान्यवर उपस्थित होते.
कार्यक्रमाचे नियोजन व आयोजन श्री काळभैरवनाथ मंदिर देवस्थानच्या वतीने करण्यात आले. मंदिराचे पुजारी भैरवकर गुरुजी यांच्या हस्ते विशेष पूजा, आरती व धार्मिक विधी संपन्न झाले. भाविकांनी श्री काळभैरवनाथांचे दर्शन घेऊन सुख, समृद्धी व आरोग्यासाठी प्रार्थना केली.
सोमवती अमावास्येच्या निमित्ताने आयोजित करण्यात आलेला हा धार्मिक सोहळा भक्तिभाव, परंपरा आणि सामाजिक ऐक्याचे दर्शन घडवणारा ठरला. कार्यक्रमाच्या यशस्वी आयोजनाबद्दल ग्रामस्थ व भाविकांनी देवस्थान समितीचे अभिनंदन केले.
✍🏻मुख्य संपादक – रोहिदास कदम
