आळंदी (प्रतिनिधी रविदास कदम)पोलीस आयुक्तांना पत्र
चाकण : चाकण नगरपरिषद हद्दीतील P1 व P2 पार्किंग व्यवस्थेअभावी वाहनांवर टोईंग करून करण्यात येणारी कारवाई तात्काळ स्थगित करावी, अशी मागणी महाराष्ट्र प्रदूषण नियंत्रण मंडळाचे सदस्य नितीन गुलाबराव गोरे यांनी पिंपरी-चिंचवड पोलीस आयुक्त विनयकुमार चौबे यांच्याकडे केली आहे.
यासंदर्भात त्यांनी लेखी पत्र देत चाकण शहरात सध्या पुरेशी, नियोजित आणि सक्षम पार्किंग व्यवस्था उपलब्ध नसल्याचे नमूद केले आहे. चाकण हे वेगाने विकसित होणारे औद्योगिक शहर असून येथे स्थलांतर, व्यापारी उलाढाल आणि वाहनसंख्या मोठ्या प्रमाणात वाढली आहे. मात्र त्यानुसार पार्किंगचे नियोजन करण्यात आले नसल्याने नागरिकांना मोठ्या अडचणींचा सामना करावा लागत आहे.
शहरातील व्यापारी, फेरीवाले, कामगार आणि सर्वसामान्य नागरिक पर्यायी पार्किंग व्यवस्थेअभावी रस्त्याच्या कडेला वाहने उभी करत आहेत. अशा परिस्थितीत वाहतूक पोलिसांकडून टोईंगद्वारे करण्यात येणारी कारवाई नागरिकांसाठी आर्थिक भुर्दंड ठरत असल्याची भावना व्यक्त करण्यात आली आहे.
नितीन गोरे यांनी पत्रात नमूद केले की, चाकण नगरपरिषदेच्या सर्वसाधारण सभेतही संबंधित कारवाई रद्द करण्याबाबत ठराव मंजूर करण्यात आला आहे. तसेच शहराचा विकास आराखडा अंतिम होऊन आवश्यक पार्किंग सुविधा निर्माण होईपर्यंत P1-P2 पार्किंग झोनमधील दंडात्मक कारवाई थांबवावी, अशी मागणी त्यांनी केली आहे.
✍🏻मुख्य संपादक – रोहिदास कदम
