काळदरी (प्रतिनिधी अशोक कुंभार:)नातेसंबंध, माणुसकी आणि भावकीला काळीमा फासणारी धक्कादायक घटना काळदरी येथे समोर आली आहे. स्वतःच्या मोठ्या भावाने कष्टाचे पैसे खर्च करून शिकवून वकील बनवलेल्या लहान भावावरच आता अपंग मोठ्या भावाच्या शेतीवर डोळा ठेवल्याचा गंभीर आरोप करण्यात आला आहे.
मिळालेल्या माहितीनुसार, दत्तात्रय किसनराव थोपटे यांनी आयुष्यभर शेतीत राबून आपल्या कुटुंबासह लहान भाऊ मोहन किसनराव थोपटे यांना उच्च शिक्षण दिले. मात्र, २००७ मध्ये झालेल्या भीषण अपघातात दत्तात्रय थोपटे यांना कायमचे अपंगत्व आले. त्यानंतर कुटुंबावर आर्थिक संकट कोसळले.
पीडित कुटुंबाच्या आरोपानुसार, या परिस्थितीचा फायदा घेत लहान भावाने मोठ्या भावाच्या शेतीवरील हक्कांवर गदा आणण्यास सुरुवात केली. शेतात जाणाऱ्या पिढ्यानपिढ्यांच्या वहिवाटीचा रस्ता रोखण्यात आल्याने शेतीची कामे ठप्प झाली आहेत. तसेच शेतात ट्रॅक्टर जाऊ नये यासाठी संबंधितांना दमदाटी करण्यात आल्याचाही आरोप करण्यात आला आहे.
पीडित कुटुंबीयांनी सांगितले की, अपंग पती, पत्नी आणि मुलांवर सातत्याने मानसिक दबाव निर्माण केला जात असून न्याय मागण्यासाठी प्रशासनाचे दरवाजे ठोठावण्याची वेळ त्यांच्यावर आली आहे. रस्ता बंद झाल्यामुळे शेती करणे अशक्य झाले असून कुटुंबाच्या उदरनिर्वाहाचा प्रश्न गंभीर बनला आहे.
या घटनेमुळे परिसरात संतापाचे वातावरण निर्माण झाले आहे. समाजाला न्याय देण्याची जबाबदारी असलेल्या व्यक्तीवरच अन्याय केल्याचा आरोप होत असल्याने ग्रामस्थांकडूनही आश्चर्य व्यक्त केले जात आहे.
दरम्यान, या प्रकरणाची निष्पक्ष चौकशी करून पीडित कुटुंबाला न्याय मिळवून द्यावा आणि वहिवाटीचा रस्ता तातडीने खुला करावा, अशी मागणी ग्रामस्थांकडून करण्यात येत आहे.
“ज्याला शिकवून वकील बनवलं, त्याच भावाने अपंग भावाचाच रस्ता रोखला?”
✍🏻मुख्य संपादक – रोहिदास कदम
