- आळंदी दि.13 (वार्ताहर सचिन शिंदे ): मरकळ येथील बागवान वस्ती परिसरात शुक्रवारी (दि.१३ मार्च २०२६) दुपारी साडेबाराच्या सुमारास एका घराला भीषण आग लागल्याची घटना घडली. प्राथमिक माहितीनुसार शॉर्ट सर्किटमुळे ही आग लागली असल्याचे समजते.
आगीची तीव्रता वाढत गेल्याने घरातील फ्रीजचा जोरदार स्फोट झाला. या स्फोटामुळे आग संपूर्ण घरभर पसरली आणि घरातील जीवनावश्यक वस्तू जळून खाक झाल्या. या घटनेत सुदैवाने कोणतीही जीवितहानी झाली नसली तरी कुटुंबाचे मोठे आर्थिक नुकसान झाले आहे.
मरकळ येथील बागवान वस्तीत राहणारे अतुल महादेव देवकर यांच्या घरात ही घटना घडली. घटनेची माहिती मिळताच आळंदी नगरपरिषदेच्या अग्निशमन दलाने तात्काळ घटनास्थळी धाव घेतली.
अग्निशमन दलाचे वाहन चालक प्रथमेश होले, तसेच फायरमन इंद्रजीत घुंडरे आणि सिद्धेश गारडे यांनी शर्थीचे प्रयत्न करून आगीवर नियंत्रण मिळवले. त्यांच्या तत्परतेमुळे आग अधिक पसरण्यापासून रोखण्यात यश आले.
या घटनेची माहिती आळंदी नगरपरिषद अग्निशमन विभागीय अधिकारी प्रदीप आवारी यांनी दिली.
✍🏻मुख्य संपादक – रोहिदास कदम
