,( सासवड प्रतिनिधी अशोक कुंभार )
लोणी काळभोर (पुणे) – पुणे शहराची जीवनवाहिनी असलेल्या मुळा-मुठा नदीच्या पात्रात अवैधरित्या टाकण्यात येणाऱ्या कचऱ्याला शुक्रवारी सकाळी भीषण आग लागल्याची धक्कादायक घटना उघडकीस आली. या आगीमुळे परिसरात प्रचंड विषारी धुराचे लोट पसरले असून श्वसनाचा त्रास झाल्याने एमआयटी एडीटी विद्यापीठ येथील काही विद्यार्थ्यांना मध्यरात्री तातडीने जवळच्या रुग्णालयात दाखल करावे लागले.
😷 विद्यार्थ्यांना श्वसनाचा त्रास
एमआयटी शैक्षणिक संकुलात सध्या सुमारे २० हजार विद्यार्थी शिक्षण घेत असून त्यापैकी सुमारे ५ हजार विद्यार्थी व १ हजार कर्मचारी परिसरात वास्तव्यास आहेत. शुक्रवारी दिवसभर अग्निशमन दलाने प्रयत्न करूनही आग पूर्णपणे विझवता आली नाही. रात्री उशिरा धुराचे प्रमाण वाढल्याने वसतिगृहातील विद्यार्थ्यांना श्वास घेण्यास त्रास, डोळ्यांची जळजळ, घसा बसणे असे प्रकार जाणवू लागले. काही विद्यार्थ्यांची प्रकृती बिघडल्याने त्यांना रुग्णालयात दाखल करण्यात आले.
🚦 वाहतुकीवर परिणाम, सुट्टी जाहीर
विषारी धुरामुळे परिसरातील दृश्यमानता कमी झाली. त्याचा परिणाम पुणे-सोलापूर महामार्गावरील वाहतुकीवर झाला. तसेच एका कंपनीसह एमआयटी संकुलालाही शनिवारी सुट्टी जाहीर करावी लागली. लोणी-काळभोर व कदमवाकवस्ती ग्रामपंचायतींचे पदाधिकारी, स्थानिक अधिकारी व पोलिसांनी घटनास्थळी भेट देऊन पाहणी केली.
♻️ दररोज ३०-३५ ट्रॉली कचरा नदीपात्रात
लोणी काळभोर आणि कदमवाकवस्ती या मोठ्या ग्रामपंचायतींच्या हद्दीत दररोज मोठ्या प्रमाणावर ओला व सुका कचरा निर्माण होतो. मात्र घनकचरा व्यवस्थापनासाठी स्वतंत्र जागा किंवा प्रक्रिया प्रकल्प उपलब्ध नसल्याने नाइलाजास्तव सुमारे ३० ते ३५ ट्रॉलींहून अधिक कचरा थेट नदीपात्रात टाकला जात असल्याची माहिती समोर आली आहे.
यामुळे नदीपात्रात कचऱ्याचे डोंगर तयार झाले असून दुर्गंधी, वायुप्रदूषण आणि जलप्रदूषणात मोठी वाढ झाली आहे. जलचरांनाही धोका निर्माण झाला असून पर्यावरणप्रेमींनी या प्रकाराला अत्यंत गंभीर मानले आहे.
🗣️ प्रतिक्रिया
चित्तरंजन गायकवाड, माजी सरपंच, कदमवाकवस्ती ग्रामपंचायत
“दोन्ही ग्रामपंचायतींनी घनकचरा व्यवस्थापनासाठी स्वतंत्र जागा मिळावी यासाठी जिल्हा प्रशासनाकडे प्रस्ताव पाठवले आहेत. शासनाने तातडीने जागा उपलब्ध करून दिल्यास कचरा प्रक्रिया प्रकल्प उभारता येईल व नदीपात्रात कचरा टाकणे थांबेल.”
डॉ. महेश चोपडे, कुलसचिव, एमआयटी एडीटी विद्यापीठ
“नदीपात्रात कचऱ्याचे डोंगर उभे राहून त्यास सातत्याने आग लागणे ही गंभीर बाब आहे. विषारी धुरामुळे विद्यार्थ्यांना त्रास होत आहे. जिल्हा प्रशासनाने तातडीने हस्तक्षेप करून अवैध कचरा टाकणे बंद करावे व ग्रामपंचायतींना घनकचरा व्यवस्थापनासाठी जागा उपलब्ध करून द्यावी.”
⚠️ पर्यावरण आणि आरोग्यावर गंभीर प्रश्न
स्वच्छ भारत मोहिमेच्या पार्श्वभूमीवर नदी संवर्धनाचे प्रयत्न सुरू असताना, मुळा-मुठा नदीपात्रात थेट कचरा टाकणे आणि त्याला आग लागणे ही अत्यंत चिंताजनक बाब आहे. वायुप्रदूषणाबरोबरच जलप्रदूषणातही वाढ होत असून नागरिकांच्या आरोग्याचा प्रश्न ऐरणीवर आला आहे.
नागरिकांची मागणी:
नदीपात्रात कचरा टाकणे तात्काळ बंद करावे
घनकचरा व्यवस्थापनासाठी स्वतंत्र जागा उपलब्ध करावी
जबाबदारांवर कठोर कारवाई करावी
पर्यावरण संरक्षणासाठी कायमस्वरूपी उपाययोजना राबवाव्यात. https://youtube.com/shorts/cRA0tD_4vCU?si=TeXSkqVi7kvlD0oW चॅनलला सबस्क्राईब करा लाईक करा आपल्या विभागातील बातम्या व जाहिरातीसाठी सहकार्य करा
✍🏻मुख्य संपादक – रोहिदास कदम
