मानव मित्र न्यूज( संपादक रोहिदास कदम,)
📍 पुणे : एमआयटी आर्ट, डिझाईन अँड टेक्नॉलॉजी (MIT ADT) विद्यापीठाच्या यांत्रिकी अभियांत्रिकी विभागातील ‘टीम स्पीडटेल रेसिंग’ने तामिळनाडूतील कोईम्बतूर येथील कारी मोटर स्पीडवेवर पार पडलेल्या ‘फॉर्म्युला भारत 2026 (डायनॅमिक्स)’ या प्रतिष्ठित राष्ट्रीय स्पर्धेत उल्लेखनीय कामगिरी करत कंबशन प्रकारात ‘ओव्हरऑल डायनॅमिक्स’ विजेतेपद पटकावले आहे.
या स्पर्धेदरम्यान संघातील अभिषेक साहा याने उत्कृष्ट वाहनचालन कौशल्य आणि तांत्रिक प्रावीण्य दाखवत ‘सर्वोत्तम चालक पुरस्कार’ही आपल्या नावावर केला. वाहन रचना, गतिशास्त्र आणि अभियांत्रिकी नवकल्पनांमधील उत्कृष्ट कामगिरीमुळे संघाला हे यश मिळाले.
फॉर्म्युला भारत ही अभियांत्रिकी विद्यार्थ्यांसाठीची राष्ट्रीय स्तरावरील प्रतिष्ठित मोटरस्पोर्ट स्पर्धा असून देशभरातील महाविद्यालयीन संघ स्वतः डिझाईन आणि तयार केलेल्या फॉर्म्युला-शैलीतील रेस कार्स सादर करतात. या यशात एरोस्पेस, इलेक्ट्रॉनिक्स विभाग आणि इन्स्टिट्यूट ऑफ डिझाईन (IOD) मधील विद्यार्थ्यांचा सक्रिय सहभाग होता, ज्यामुळे विविध शाखांतील प्रभावी समन्वय दिसून आला.
या संघाला डॉ. अनुराग नेमा आणि प्रा. विजयकुमार शेप यांचे मार्गदर्शन लाभले. या यशाबद्दल विद्यापीठाचे संस्थापक अध्यक्ष व कुलपती प्रा. डॉ. विश्वनाथ दा. कराड, कार्याध्यक्ष प्रा. डॉ. मंगेश कराड, कार्यकारी संचालक डॉ. सुनीता कराड, कुलगुरु डॉ. राजेश एस., प्रोवोस्ट डॉ. सायली गणकर यांसह मान्यवरांनी अभिनंदन केले.
✍🏻मुख्य संपादक – रोहिदास कदम
