पुरंदर प्रतिनिधी अशोक कुंभार/
पुरंदर तालुक्यात राष्ट्रवादीची एकजूट; उमेदवार यादी जाहीर
जिल्हा परिषद व पंचायत समिती निवडणुका : राष्ट्रवादी काँग्रेस एकत्र लढणार
आगामी जिल्हा परिषद व पंचायत समिती निवडणुकांसाठी राष्ट्रवादी काँग्रेस पक्ष एकत्रितपणे लढणार असल्याचे स्पष्ट झाले आहे. सासवड तालुका पुरंदर, जिल्हा पुणे येथे पार पडलेल्या बैठका व उमेदवार मुलाखतीनंतर पक्षातील सर्व घटकांनी मतभेद बाजूला ठेवत एकसंघ होण्याचा निर्णय घेतला आहे.
दिनांक 17 जानेवारी 2026 रोजी राष्ट्रवादी काँग्रेस पार्टीच्या सासवड येथील कार्यालयात पंचायत समिती व जिल्हा परिषद उमेदवारांच्या मुलाखती घेण्यात आल्या. या प्रक्रियेत तालुक्यातील विविध गण व गटांमधील इच्छुक उमेदवार मोठ्या संख्येने सहभागी झाले होते. मुलाखतीनंतर पंचायत समिती व जिल्हा परिषदेसाठी उमेदवारांची अधिकृत नावे व यादी जाहीर करण्यात आली.
यापूर्वी सासवड येथे आयोजित करण्यात आलेल्या पक्षाच्या बैठकीला पदाधिकारी, कार्यकर्ते व इच्छुकांची मोठी उपस्थिती होती. सभागृह खचाखच भरलेले असून, बैठकीत पक्षाची संघटनात्मक ताकद दिसून आली. बैठकीदरम्यान दोन्ही राष्ट्रवादी गटांतील नेते व कार्यकर्ते एकत्र येऊन निवडणूक लढवणार असल्याचा स्पष्ट संदेश देण्यात आला.
एकत्रित लढ्याच्या निर्णयामुळे पुरंदर तालुक्यातील जिल्हा परिषद व पंचायत समिती निवडणुकीत राष्ट्रवादी काँग्रेसला बळ मिळणार असल्याचे चित्र आहे. उमेदवार यादी जाहीर झाल्यानंतर कार्यकर्त्यांमध्ये उत्साहाचे वातावरण निर्माण झाले असून, प्रचाराची तयारी सुरू झाली आहे.
पक्षाची एकजूट, संघटन व कार्यकर्त्यांची ताकद पाहता आगामी निवडणुकीत राष्ट्रवादी काँग्रेस निर्णायक भूमिका बजावेल, असा विश्वास पक्ष पदाधिकाऱ्यांनी व्यक्त केला आहे.
✍🏻मुख्य संपादक – रोहिदास कदम
