रथसप्तमी उत्साहात साजरी
मेदनकरवाडीत रथसप्तमी परंपरेने व भक्तिभावात साजरी
आळंदी (रविदास कदम); मेदनकरवाडी येथील श्री खंडोबा देवस्थानमध्ये रथसप्तमी निमित्त पारंपरिक धार्मिक विधी, पूजा-अर्चा व विविध कार्यक्रमांच्या आयोजनासह रथसप्तमी उत्साहात साजरी करण्यात आली. मंदिरावर आकर्षक विद्युत रोषणाई करण्यात आली होती. रथसप्तमीच्या निमित्ताने श्री खंडोबा महाराजांचा पुष्पसजावटीने सजवलेला वैभवी मानाचा गाडा विधीवत पूजन करून भंडारा वाहण्यात आला.
पहाटे पाच वाजल्यापासून संध्याकाळपर्यंत श्रींची पूजा-अर्चा, आरती व देवाच्या पदांचे गायन सुरू होते. दर्शनासाठी भाविकांची मोठी गर्दी उसळली होती. शिस्तबद्ध रांगेत हजारो भाविकांनी श्री खंडोबा महाराजांचे तसेच मानाच्या गाड्याचे दर्शन घेतले.
मेदनकरवाडीतील श्री खंडोबा महाराजांचे सेवेकरी म्हणून चऱ्होली, कुरूळी व चाकण परिसरातून मानकरी उपस्थित राहतात. राज्यभरातून भाविक नवसासाठी येथे येत असून “नवसाला पावणारा देव” अशी श्रींची ख्याती आहे.
मंदिराचे सेवेकरी अरुण तोडकर व ग्रामस्थांच्या सहभागातून रथसप्तमी ते माघ पौर्णिमा या कालावधीत परंपरेनुसार नित्यपूजा केली जाते. रथसप्तमीच्या दिवशी पूजा व आरतीनंतर भाविकांना अन्नदान महाप्रसाद वाटप करण्यात आले. तसेच रथसप्तमी ते माघ पौर्णिमा या नऊ दिवसांत मानाच्या गाड्याला पाणी घालण्याची परंपरा भक्तिभावाने पाळली जाते.
रथसप्तमी निमित्त मंदिरासमोर बैलगाडा पूजन करण्यात आले. मेदनकरवाडीतील श्री खंडोबा देवस्थान हे राज्यात परिचित व प्रसिद्ध श्रीक्षेत्र असून, या पवित्र दिवशी भाविकांनी मोठ्या संख्येने उपस्थित राहून प्रथा-परंपरांचे पालन करत श्रींचे दर्शन घेतले.
✍🏻मुख्य संपादक – रोहिदास कदम
