डी. वाय. पाटील विद्यापीठाच्या सामाजिक उपक्रमातून गरजूंना दिलासा ; मेगा फूड डोनेशन ड्राईव्हला उत्स्फूर्त प्रतिसाद
आळंदी (रवि कदम):
जागतिक शांतता दिनाचे औचित्य साधून अजिंक्य डी. वाय. पाटील विद्यापीठ, लोहगाव व संलग्न संस्थांनी एक आगळावेगळा उपक्रम राबविला. आळंदी, विश्रांतवाडी, वाघोली, लोहगाव, अनाथ आश्रम, वृद्धाश्रम तसेच पुणे रेल्वे स्थानक येथे शेकडो गरजूंना ‘पीस पुलाव’चे वाटप करून दिवस साजरा करण्यात आला. 
🌍 डी. वाय. पाटील विद्यापीठाचा उपक्रम
कार्यकारी उपाध्यक्ष डॉ. कमलजीत कौर यांच्या मार्गदर्शनाखाली विद्यापीठातील रोट्रॅक्ट क्लब, राष्ट्रीय सेवा योजना विभाग, अभियांत्रिकी महाविद्यालय व दंत महाविद्यालय यांच्या संयुक्त विद्यमाने मेगा फूड डोनेशन ड्राईव्ह पार पडला.
विद्यार्थी, शिक्षक व शिक्षकेतर कर्मचाऱ्यांनी स्वखर्चातून देणगी जमा करून पुलाव तयार केला आणि परिसरातील गरजूंना वितरित केला.
👥 मानवतेचा संदेश देणारा उपक्रम
डी. वाय. पाटील विद्यापीठाच्या पुढाकारामुळे विविध धर्म व पार्श्वभूमीतील लोक एकत्र आले. समाजातील वंचित घटकांपर्यंत अन्नदान पोहोचवून ‘शांतता आणि मानवतेचा संदेश’ दिला गेला.
🎓 विद्यापीठ पदाधिकाऱ्यांचे मार्गदर्शन
या उपक्रमाला दंत महाविद्यालयाचे अधिष्ठाता डॉ. आनंद शिगली, विद्यापीठाचे कुलगुरू डॉ. राकेश कुमार जैन आणि अभियांत्रिकी महाविद्यालयाचे प्राचार्य डॉ. फारुख सय्यद यांचे मोलाचे मार्गदर्शन लाभले.
राष्ट्रीय सेवा योजना विभागातील कार्यक्रमाधिकारी, रोट्रॅक्ट क्लबचे सदस्य आणि स्वयंसेवकांनी अथक परिश्रम घेऊन हा उपक्रम यशस्वी केला.
🌱 विद्यार्थ्यांचा आदर्शवत सहभाग
डी. वाय. पाटील विद्यापीठ व महाविद्यालयातील पदाधिकाऱ्यांनी विद्यार्थ्यांच्या या नाविन्यपूर्ण उपक्रमाचे कौतुक केले. “सामाजिक जाणिवा वाढवणारा व समाजोपयोगी उपक्रम राबविण्याचे धाडस विद्यार्थ्यांनी दाखवले आहे,” असे मत व्यक्त करून व्यवस्थापनाने पुढील काळातही अशाच उपक्रमांना प्रोत्साहन देण्याची ग्वाही दिली.
✍🏻मुख्य संपादक – रोहिदास कदम
