(सासवड प्रतिनिधी अशोक कुंभार)
पंढरपूर : जागतिक परिस्थितीमुळे व्यावसायिक गॅस सिलेंडरच्या पुरवठ्यावर मर्यादा आल्याने अनेक ठिकाणी हॉटेल व्यवसायावर परिणाम झाला आहे. मात्र, अशा परिस्थितीतही पंढरपूर येथील विठ्ठल-रुक्मिणी मंदिर समितीने भाविकांसाठी सुरू असलेले अन्नछत्र अखंडित ठेवण्याचा निर्णय घेतला आहे.
मंदिर समितीने प्रशासन आणि गॅस वितरकांशी समन्वय साधून अन्नछत्रासाठी आवश्यक असलेल्या गॅस सिलेंडरचा नियमित पुरवठा सुरू राहील याची व्यवस्था केली आहे. त्यामुळे इंधन टंचाई असली तरी विठ्ठल दर्शनासाठी येणाऱ्या भाविकांना महाप्रसादाची सुविधा पूर्ववत सुरू राहणार आहे.
मंदिर समितीच्या या नियोजनामुळे बाहेरील अनेक हॉटेल्स बंद असतानाही भाविकांची गैरसोय होणार नाही, अशी माहिती देण्यात आली आहे. दररोज मोठ्या संख्येने येणाऱ्या भाविकांसाठी अन्नछत्र हे महत्त्वाचे केंद्र असून मंदिर प्रशासनाने त्यासाठी आवश्यक सर्व तयारी केली आहे.
✍🏻मुख्य संपादक – रोहिदास कदम
