,, (सासवड प्रतिनिधी अशोक कुंभार )
पुणे येथील भाविक श्री बाप्पू कडू यांनी संत सोपानदेव (सोपानकाका) यांच्या समाधीस सुमारे साडेसात लाख रुपयांची चांदीची प्रभावळ अर्पण केली. आपल्या आई-वडील वै. सरस्वतीबाई व वै. शिवाजीराव तुकाराम कडू तसेच सासू-सासरे स्व. गुणाबाई व स्व. बाळासाहेब कोंडे यांच्या स्मरणार्थ ही प्रभावळ अर्पण केल्याची माहिती देवस्थानचे प्रमुख विश्वस्त त्रिगुण महाराज गोसावी यांनी दिली.
प्रभावळीवर कीर्तीमुख, चंद्र, सूर्य, मोर, वेलबुट्टी अशा आकर्षक आकृत्या कोरलेल्या असून वरच्या बाजूस दोन ध्वज व दोन अब्दागिरी कोरल्या आहेत. पारंपरिक शिल्पकलेचा उत्कृष्ट नमुना म्हणून ही प्रभावळ भाविकांचे लक्ष वेधून घेत आहे.
महापूजा व कीर्तनसेवा
यानिमित्त सकाळी कडू परिवारातर्फे संत सोपानदेवांच्या पादुकांची महापूजा करण्यात आली. सकाळी १० ते १२ या वेळेत ह.भ.प. चंद्रकांत महाराज वांजळे यांची “मन माझे लागो सोपानचरणी” या अभंगावर कीर्तनसेवा झाली. कीर्तनामध्ये महाराजांनी सोपानकाकांचे महात्म्य तसेच प्रभावळीचे आणि दानधर्माचे महत्व भावपूर्ण शब्दांत विषद केले.
यानंतर गाभाऱ्यात श्री बाप्पू कडू, सौ. सुनिता कडू, प्रतिक कडू, सौ. ऐश्वर्या मगर व गौरव मगर यांच्या हस्ते प्रभावळीची विधीवत पूजा करून ती श्रींच्या मागे स्थापित करण्यात आली.
मान्यवरांची उपस्थिती व सन्मान
कार्यक्रमास देवस्थानचे विश्वस्त गोपाळकाका गोसावी, गौतम गोसावी, श्रीकांत काका गोसावी, मधुकाका गोसावी तसेच पुजारी प्रशांत पुरंदरे, चोपदार सिद्धेश शिंदे, अभय जगताप आदी उपस्थित होते. कडू परिवारातर्फे वांजळे महाराज, विश्वस्त, पुजारी, चोपदार व सेवेकऱ्यांचा सन्मान करण्यात आला.
कीर्तनानंतर महाप्रसादाचे आयोजन करण्यात आले होते. सोपानदेवांच्या पालखी सोहळ्यात सहभागी होणाऱ्या वंजारवाडीकर दिंडीचे वारकरी तसेच पसायदान वारकरी शिक्षण संस्थेचे विद्यार्थी मोठ्या संख्येने उपस्थित होते.
✍🏻मुख्य संपादक – रोहिदास कदम
