,,(प्रतिनिधी धाराशिव)
धाराशिव : जिल्ह्यातील गवळेवाडी येथे अत्यंत धक्कादायक घटना उघडकीस आली आहे. अवघ्या १३ महिन्यांच्या चिमुकलीची तिच्याच चुलत्याने निर्घृण हत्या केल्याचा प्रकार समोर आला असून पोलिसांनी आरोपीला अटक केली आहे.
मिळालेल्या माहितीनुसार, संबंधित मुलगी अचानक बेपत्ता झाल्याची तक्रार कुटुंबीयांनी पोलिसांत दाखल केली होती. सुरुवातीला अज्ञात व्यक्तीने अपहरण केल्याचा संशय व्यक्त करण्यात आला होता. मात्र पोलिसांनी सखोल तपास सुरू केल्यानंतर संशयाची सुई घरातीलच व्यक्तीकडे वळली.
तपासादरम्यान आरोपी चुलता शंकरराव माने (नाव बदललेले) याची चौकशी करण्यात आली असता त्याने गुन्ह्याची कबुली दिल्याची माहिती समोर आली आहे. कौटुंबिक वाद आणि संशयातून त्याने हे कृत्य केल्याचे प्राथमिक चौकशीतून स्पष्ट झाले आहे. आरोपीने कोयत्याने वार करून मुलीची हत्या केली व पुरावे लपविण्याच्या उद्देशाने मृतदेह जमिनीत पुरल्याचे पोलिसांनी सांगितले.
घटनेची माहिती मिळताच परिसरात एकच खळबळ उडाली असून नागरिकांमध्ये संताप व्यक्त केला जात आहे. पोलिसांनी आरोपीविरुद्ध खूनाचा गुन्हा दाखल करून पुढील तपास सुरू केला आहे. न्यायालयात हजर केल्यानंतर त्याला पोलीस कोठडी सुनावण्यात येण्याची शक्यता आहे.
या घटनेमुळे धाराशिव जिल्ह्यात हळहळ व्यक्त होत असून बालकांच्या सुरक्षिततेचा प्रश्न पुन्हा एकदा ऐरणीवर आला आहे.
✍🏻मुख्य संपादक – रोहिदास कदम
