आळंदी, दि. १७ (वार्ताहर.सचिन शिंदे)
सर्व संतांच्या पुण्यतिथी सर्व समाजाने एकत्रित साजऱ्या करण्याच्या संकल्पनेतून श्री संत सोपानकाका महाराज यांचा समाधी सोहळा आळंदी येथील श्री संत ज्ञानेश्वर महाराज मंदिरात भक्तिभावात पार पडला. यावेळी श्री संत जगनाडे महाराज व श्री संत कान्होराज महाराज यांच्या त्रिवेणी संगमाचा समाधी सोहळा व पुण्यतिथी कार्यक्रमही साजरा करण्यात आला.
कार्यक्रमाच्या प्रारंभी तिन्ही संतांच्या प्रतिमांना पुष्पहार अर्पण करून विधिवत पूजन करण्यात आले. त्यानंतर ह.भ.प. गजानन महाराज शास्त्री यांचे सुमधुर कीर्तन झाले. कीर्तनाला श्रीरामकृष्ण आध्यात्मिक वारकरी शिक्षण संस्था, आळंदी देवाची येथील विद्यार्थ्यांनी साथसंगत केली. ही संस्था वर्षभर श्री ज्ञानोबारायांच्या मंदिरातील विविध सेवांमध्ये सक्रिय असते.
ह.भ.प. गजानन महाराज शास्त्री यांनी आपल्या कीर्तनातून श्री संत सोपानकाका महाराज, श्री संत कान्होराज महाराज व श्री संत जगनाडे महाराज यांच्या जीवनकार्याचा प्रभावी आढावा घेत उपस्थित भाविकांना मंत्रमुग्ध केले. परभणी जिल्ह्यातून खास ज्ञानोबारायांच्या सेवेसाठी उपस्थित राहून त्यांनी आपली सेवा पूर्ण केली.
या कार्यक्रमास कै. ह.भ.प. बाळकृष्ण महाराज दिंडी, श्रीरामकृष्ण आध्यात्मिक वारकरी शिक्षण संस्था, ज्ञानेश्वर महाराज संस्थान कमिटी, वारकरी सेवा संघ यांचे पदाधिकारी तसेच मोहन महाराज शिंदे, रामचंद्र महाराज सारंग, रवींद्र महाराज कुमकर यांच्यासह अनेक मान्यवर व भाविक मोठ्या संख्येने उपस्थित होते.
✍🏻मुख्य संपादक – रोहिदास कदम
